Faleminderit djema, jemi krenar edhe me ju!

Deklarata primitive dhe e pakuptimtë e presidentit të Federatës Shqiptare të Futbollit, Armand Duka, pas ndeshjes me Qipron ka shkaktuar një tension të panevojshëm te tifozët kuqezi por edhe te futbollistët e kombëtares shqiptare mbrëmjen e shkuar. Sikur nuk mungonte kjo, edhe deputeti i PDK-së, Berat Buzhala bëri një deklaratë po aq primitive sa ajo e Dukës, por këtë herë duke u pozicionuar në skajin tjetër të polemikave.

Gjatë ndeshjes, në shumë raste është vërejtur nervozizëm i tepruar dhe ndërhyrje të panevojshme ndaj futbollistëve shqiptarë të Zvicrës, sidomos ndaj Shaqirit. Presioni mediatik disa ditor, bëri të veten dhe kjo është e kuptueshme.

Por, përkundër këtij presioni, futbollistët shqiptarë të Zvicrës në asnjë moment nuk kanë provokuar tifozët apo futbollistët e kombëtares shqiptare. Përkundrazi, Shaqiriedhe pas golit të shënuar nuk u gëzua aq sa jemi mësuar ta shohim të gëzohet pas shënimit të një goli, Granit Xhaka nuk gjuajti topin në një pozicion të sigurtë ndërsa Admir Mehmeti u gëzua duke "faleminderuar Zotin" që topi i tij përfundoi në duart e portierit Ujkani.

Ajo që mësuam mbrëmë të gjithë ishte se edhe ata djemë që luajnë më Zvicrën nuk janë më pak shqiptarë se të tjerët, prandaj meritojnë respekt.

Në një gjë jemi të sigurtë; Shaqiri, Xhaka, Mehmedi, Behrami dhe Xhemaili do të jenë ambasadorët më të mirë të Shqipërisë në Botërorin Brazil 2014, dhe të jeni të sigurtë, që do t'i bëjnë reklamë Shqipërisë më shumë se mund t'i bëjmë të gjithë ne së bashku.

Edhe njëherë, faleminderit djema. Ne jemi po aq krenar me ju, sa ç'jemi edhe me futbollistët e kombëtares tonë.